الاثنين، 26 أكتوبر 2009

.::فى عشق ترابها::.




http://www.chalhoub-group.com/_img/country/egypt.jpg 


ويااااااااه...

من زمان ..نفسى أكتب ..وأحكى..

وأقول ع الكلام اللى ساكت سنين...




و ياااااااااااه...

ع الزمان..لما يبنى في قلبى..

قصور عشقِك انتى ..يا نور العينين....



وف الزحمه بامشى...

ولا أزهق..

ولا أشكى...

باشمّ ف ترابِك..

عبير الحنين...



و ياااااااه...

لما أتوه ف الموانى ..وأسافر..

وغربة بعادِك..

ف روحى بتخلق..

مراره ..وأنين...

وأرجع..وألاقى..

عيونٍك تشاور..

تقولّي تعالِى..

تمدّّ الإيدين....



ساعتها..بقول..إن روحى ف ترابِك..

حياتي..ودمى..وعمري..زمانِك..

ويفضل ف قلبي..برج..وهرمْ..

ونيل يروى حبّى..

ويحكى النغمْ......



وصوره..وضفاير..

لبنّوته حلوه..

وبتغنّى غنوه..


عشانّا..وعشانِك.........

هناك 11 تعليقًا:

هيثــم رمضـــان يقول...

تصفيق حاد
بجد كلمات رائعه وكأني بقرا لصلاح جاهين وجميل قوي حب الوطن في ظل تراجع شعور الأنتماء مع الاسف لدي الشباب فيما عدا مباريات كرة القدم. بجد كلماتك جميلة ومنسقه ومكتوبه بحرفيه عاليه.

تقبلي تحياتي

الشاعر الحزين يقول...

مش ممكن مش معقول

ايه المدونه الهايله دى

طيب ليه كنتى مختفه كده ومش بتظهرى

دا أنا بمجرد ما قرأت بوست واحد لقيتنى مش قادر أخرج من المدونه من غير ما أكمل باقى البوستات كلها بجد فى منتهى الجمال

كلمات هاديه

واحساس خيالى

وواقعيه ملموسه

بجد هايله

دمتى فى تألق مستمر

تحياتى

الشاعر الحزين

:: Rose :: يقول...

هيثم:
حقيقىكلماتك شجعتنى جدا جدا..
وان كنت أحسنى بعيدة طبعا عن مقارنتى بالأسامى الكبيرة دى..

شكرا وجودك حقيقى
وتشرفنى متابعتك جد
:)

:: Rose :: يقول...

الشاعر الحزين:
لا أجد رد كاف لكلماتك المشجعة جداااا..
أسعدنى ردك حقيقى..ودام وجودك بالمدونة..

بالنسبة للإختفاء..
أنا لسة عاملة المدونة قريب..
لكن بكتب من فترة مش قصيرة..

هو يمكن بس عشان فى الأول مكنش عندى تصنيف محدد لكتاباتى ودا هيظهر فى المدونة..
مابين قصص قصيرة..
أشعار عامية وأحيانا فصحى..
وأحيانا كتابات على هيئة خواطر مسترسلة ..مجرد خطوط وخربشة قلم بدون تصنيف أدبى..
فكنت بكتفى بنشرها فى منتديات الجامعة وحدود النادى الأدبى فى كليتى..

بس عندى أمل أحط جهود فى المدونة..وأحاول أطورها شوية..

شكرا مرة تانية على تشجيعك وردك..
وتشرفنى متابعتك دائما..

احساس طفلة محبة للرومانسية بس واقعية يقول...

استنى بقى انتى جيتى على الجرح
بجد كلماتك هايلة واحساسك طبيعى
اكيد حقيقى وطبيعى والا مكنش خرج منك بكل الرقة دى

استمرى وان شاء الله يدوم التواصل
حقيقى مدونتك جميلة
دمتى بكل خير
تقبلى مرورى

romansy يقول...

بما ان حضرتك كنتى سعيده بزيارتك مدونتى امنيات
انا اللى سعيد اللى اتعرفت على مدونه رقيقه كده
وكمان احب ادعوكى لزياره مدونتى التانيه والرئسيه رومنسى

romansy يقول...

فى عشق ترابها انا عاشق ومش ساكن الا فيها
دى بلدى حبيبتى مهما حاولوا وعملوا فيها
انا اعشق ترابها واعشق سحابها واعشق كل رمله فيها
بحبها ولا عمرى اعيش الا عليها

محمد خالد يقول...

مبروك بجد .. شئ اعتقد هيفيدك كتير اوي .. انا قرأت مقدمة المدونة -اول موضوع- .. صدقيني دي فضفضة من نوع مختلف واعتقد هتستريحي كتير ان شاء الله

شء جميل انك اخترتي روز بس من غير الكلمة التانية .. :)

متابع ان شاء الله .. ان طال صمتي فأنا متابع برضه ان شاء الله

:: Rose :: يقول...

إحساس طفلة محبة للرومانسية ولكن واقعية:

هوفعلا عندك حق.. فى انه جرح جوانا كلنا..
يمكن بنفقتقد كلماتنا لمصر وسط افتقادنا لوجود مصر بالصورة اللى فى خيالنا ..والغربة اللى بقينا نحسها فيها..مع ان احنا اللى ممكن نتحكم فى الغربة دى ونتخلص منها..

شكرا على ردك وكلماتك الجميلة..
ودام وجودك.. :)

:: Rose :: يقول...

romancy:
مشاركة جميلة بكلماتك فى عشق ترابها أيضا..
وان شاء الله هاكطون متابعة لمدونتك ..
دام مرورك..

:: Rose :: يقول...

محمد:
مش قادرة اقولك مدى سعادتى بمفاجأة وجودك بالمدونة..
أشكر وجودك وكلماتك..
وأتمنى دوام متابعتك :)

وهاروح عندك بقى أشوف فيه ايه هناااااااااااااااك

تقبل تحياتى