:: زى النهار ::

زى النهار ..!!
يطلع ف يوم..تِلقى الورود ..
بتتبسِّمْ..

ف ضىّ الفجر ..بتشقشق عيون الصبح..
وتتنفّس قلوب..يدوب..
بتتعلم..ْ

تقول :هاانت..
مصير الحلم..
تدبّ فيه الروح ف يوم..
ويتكلّمْ..!!
زى النهار



زى النهار..
بنورُه الباهت الكدّاب..
ونور شايل ف حضنُه سؤال..ملوهش جواب..
ونورُه الصادق الدافى..
ونوره الخادع الغدّار..
أصعب نهار ..!!



زى النهار..
بييجى بس..
علشان يسافرْ..!!

أحلام..
مابتصدّق تزورنا... وتهاجرْ..!!

وأقول :"الصبر من عند الواحد القادر"
دا القلب عُمرُه..ماكان لُه حق الإختيار..!!



زى النهار..
وأنا وانت ..وكل الخلق..
بتجمعنا لحظة نهار..
تفرّقنا ..لحظة نهار..
وأول حاجة نطلبها..ف عزّ الضّلمة والأحزان..
طلعة نهار..!!
وكل نهار..يسبق نهار..
نقول: دا كان أسعد نهار..
على ايه بقى ؟!!
ماكُلّو نهار ..!!



يفوت نهار..عشان يفتح طريق غيرُه
ويموت نهار.. عشان يدِّى الحياة لغيرُه!!
ويتسابق نهار تالت.. عشان يِوْئِد نهار غيرُه
وقلوبنا دى..
زى النهار
!!

تفوت..
تموت..
وتتسابق..

وتستنى..
طلعة نهار !!!
..
..
.