قلم.. وورقة.. وفنجان شاى

قلم..
وورقة..
وفنجان شاى..

مزيكا..
كام عود على ناى..

وأنا وسط الأوراق والزحمة..
مش قادرة أفهم ليه وازاى..
حلم بيبعد.. حلم بيهرب.. حلم يروح حالف ماهو جاى ,,
..


قلبى فــ يوم كان زى جنينة بتطرح ضىّ..
مليان أحلام ويّا براءة وشوق ومشاعر ملهاش زىّ..
مش قادرة أعرف..
ليه الخضرة .. طرحت عتمة ..
ولا قادرة أفهم ليه وازاى,,
حلم بيبعد.. حلم بيهرب.. حلم يروح حالف ماهو جاى ,,
..


كنت بشوف العمر دا وردة..
أجمل وردة وأجمل دنيا ..
مهما الكون يسقيها جروح..
كانت تطرح احلام تانية..
فجأة صحيت مالقتش ورود ..
ولا أحلام ولا صدى ولا صوت..
مش قادرة أعرف..ليه الوردة نزفت حرقة..
ولا قادرة أفهم ليه وازاى,,
حلم بيبعد.. حلم بيهرب.. حلم يروح حالف ماهو جاى ,,
..


كنت بعيش اللحظة كأنها نسمة معدية وهتفوت..
مرة نسايم حب وفرحة..
مرة نسايم قاسية وجارحة..
مرة تغنّى فــ عينى الضحكة..
مرة دموعى من غير صوت..
مش قادرة أعرف..
ليه النسمة.. سرقت من أيامى البسمة..
ولا قادرة أفهم ليه وازاى,,
حلم بيبعد.. حلم بيهرب.. حلم يروح حالف ماهو جاى ,,
..

كنت بشوف الدنيا بعينى ..
نظرة بريئة بقلب جرئ ..
كنت بطبطب على أحلامى.. وأقولّها :بكرة تشقّى طريق..
فجأة كأنى لا شفت بعينى.. ولاكانت أحلامى بتحبى..
مش قادرة اعرف ليه خدعتنى مراية قلبى..
ولا قادرة أفهم ليه وازاى,,
حلمنا يبعــــد..
حلمنا يهــــــــــــرب..
يحلف عمره فـ يوم ماهوجـــاى..
..
..